പ്രിയമുള്ളവരേ,
വിശ്വാസ പരിശീലനത്തിന്റെ പുതിയ ഒരു അധ്യയനവര്‍ഷത്തിലേക്ക് നാം പ്രവേശിച്ചിരിക്കുന്നു. നമ്മെ സൃഷ്ടിച്ച് പരിപാലിക്കുന്ന പിതാവായ ദൈവത്തില്‍ അടിയുറച്ച് വിശ്വസിച്ചുകൊണ്ടും നമ്മുടെ രക്ഷകനായ ഈശോമിശിഹായുമായുള്ള ബന്ധത്തില്‍ ആഴപ്പെട്ടുകൊണ്ടും നമ്മെ നയിക്കുന്ന പരിശുദ്ധ റൂഹായുടെ പ്രേരണയ്ക്കനുസരിച്ച് വ്യാപരിച്ചുകൊണ്ടും വിശ്വാസ ജീവിതത്തില്‍ നമുക്ക് പരിശീലനം നേടാം.

വിശ്വാസം എന്നത് ദൈവം നമുക്ക് നല്കുന്ന ഒരു സമ്മാനമാണ്; നമ്മുടെ കഴിവുകളോ മേന്മയോ ഒന്നും നോക്കാതെ ദൈവം നല്കുന്ന ദാനം. അമൂല്യമായ ഈ സമ്മാനം നല്കി നമ്മോട് നിരന്തരം ബന്ധപ്പെടാന്‍, കൂട്ടുകൂടാന്‍ ആഗ്രഹിക്കുന്ന ദൈവത്തോട് എങ്ങനെ നമുക്ക് മറുപടി നല്കാന്‍ സാധിക്കും ? നമ്മെ തേടിവരുന്ന ദൈവത്തിന് വേണ്ടവിധത്തില്‍ പ്രത്യുത്തരം നല്കാന്‍ നമ്മെ പരിശീലിപ്പിക്കുന്ന സംവിധാനമാണ് വിശ്വാസപരിശീലനവേദി. ഓരോ ഇടവകയിലേയും സണ്‍ഡേസ്‌കൂളുകള്‍ വഴിയായി ഈ പരിശീലനമാണ് നമുക്ക് ലഭിക്കുന്നത്. അവയോട് പൂര്‍ണ്ണമായും സഹകരിക്കാന്‍ നമുക്ക് പരിശ്രമിക്കാം.